الجمعة، 8 أبريل، 2011

يوم الأربعاء





و نبدأ التحدي ليوم الأربعاء، و طبعا ريوقي كان مختلف عن يوم الثلاثاء و نشيت من وقت قبل موعد الكلاس بساعتين تقريبا، و كان ريوقي عبارة عن:  روب بالفروالة، و و سندويش سليس أسمر عليه حبوب الكتان يسمونه خبرز " أوميجا 3" مع جبن و طماط، و حليب .. و هالمرة ضفت الروب في ريوقي، لأنه ربيعتي تقولي دايما تتريق روب، واايد زين حق الصبح، و قلت خل أجرب و عيبني .. 

بعدين سرت النادي و بدأ كلاسي على الساعة 9 و أنا و بنت خالوا قلنا نبا نجرب شي يديد و اللي هو 

Bollywood


قلنا بنجربه، لأنه كلاسنا اللي نبا ندخله يبدأ على الساعة 11، و لو كان هذا متعبت بيكون عنا بريك ساعه نريح  وعقب بندخل .. 

المهم دخلنا و كنا بس 3، و دخلت هندية ماشاء الله كانت مليانة و سوتلنا وورم أب، و عقب يت وحده ضعيفة و الله شكلها ولا يخصها في التدريب، و بدت ترقص، لاعت جبدنا، و لو ما دخلنا هالكلاس أبرك، أنا أول مرة أشوف وحدة عقب ما تخلص الرقصة تعلمج كيف رقصتها، و أحس ما عرقت و لا شي وكله ضحك فطساانين من الضحك، و آخر شي تميت أسوي على كيفي، و لكن الصدمة الكبرى ههههههههههههههه تتخيلون المدربة شو سوت، سارت عند غرشة بنت خالوه يوم عطشت و شربت من غرشتها ههههههه أنا وهي جي كنا *_* *_* هههههههه صدق هنووود .. أبا أعرف شي واحد هالنادي كيف يايبين هالمدربة بس هالشي الي أبا أعرفه، هههههه 
و أنا اللي أعرفه إنه حتى لو مب عندج آيبود على الأقل رتبي السيديات تاخذ 5 دقايق إتفكر شو تحط .. و لازم ترقص لين ما تخلص الغنية على كيفها مى ما تبى توقف هههههه والله هالكلاس كان مصخرة، يا يغيرون المدربة يا يشلوووونه كله .. بس المهم إنه ضحكنا ضحك ..

و بعدين سرنا أنا و بنت خالو الكوفي خذنالنا law fat blueberries muffin  طبعا طالعين من بوليوود ههههه أشكالنا إضحك و مصخرة ههههه لازم ناكللنا شي .. 


المهم بدأ كلاسي المفضل 

sh'bam

شبام عبارة عن رقصة رياضية، و ميزته تلبسون اللي تبونه، المهم إنكم تستانسوون و بس 45 دقيقة

هاي الرقصة يديده بعد نفس زومبا، بس أيدد عن زومبا .. بس شو ماتعرقون أول ما تسووون أستاااانس يوم أشوف قميصي خرسان..
بس لأنه يديد لو أسوي سيرج أبا أعرف أشياء عنه ما ألقا لأنه توه يديد .. 




و طبعا ما أنسى أشرب wheatgrass بعد الكلاس .. بس المرة الياية بشربه قبل أحسن .. لأنه على يوتيوب شفت شواب معضلينه يتريقوونه ف إن شاء الله من الإسبوع الياي بشربه  قبل التمرين .. 

المهم الغدا كان عبارة عن معكرونة باستا خضراء 100 جرام يحتوي على 250 سعرة حرارية وايد زين بس أنا زدت عن 100 جرام  يعني كمية، و سويتلي خلطة طمام على بهارات المهم  آكل و أشبع ..  و كان لذيييذ طعمه .. يم يم .. 

عقب الغدا كلت بما يقارب فنجان القهوة بلوبيريز و كلته بعد ساعة، و بعدين سويتلي white tea ربيعتي قالتلي جربيه و أحسن على ال green tea و قاعده أجربه .. بس هو ميزته أخف عنه .. 

أما العشاء فكان عبارة عن حليب فيه عسل، و سندويش بيض و جبن و طماط .. 

هذا اليوم تعلمت 
1. كل ما نظفت أكلي، كل ما شفت التمارين أسهل و أسويها أحسن عن قبل 
2. التجربة، لازم الواحد يجرب و يغير بعض العادات يعني مثل الروب، ما كنت أتخيل اتريق روب لكن جربت و حبيته و نفس الشاي لل white tea 

هناك 7 تعليقات:

علايه يقول...

تدرين أنا من بديت الدايت و أشوف في نظام ريوقي روب

بس أبدل الروب بالحليب، كنت استغرب انه كيف الواحد يبدا يومه بروب!!!

بس خلاص شجعتيني، سيروا ونحن من ورائكم

AM.SA.CHANNEL يقول...

علايه ...

هههههههههههههه ظحكتيني، أنا و الله ما عرفت هالشي إلا من ربيعتي هي تحب تاكل كل شي صحي ما شاء الله، و أحس إني وايد أتأثر فيها .. ف يوم قالت روب إستغربت، ف بديت قلت بدال ما أكله حق عقب الظهر بجربه و يا الريوق، و عيبني الصراحة، بس مب الروب العادي، آخذ روب بالفراولة أو الفانيليا عشان أستسيغه، و أشرب بعد حليب .. ما أقدر أستغنا عنه .. ما خبرتينا شو كان جدولج اليوم أو طول الإسبوع نفس الأكل

علايه يقول...

لا فديتج، كل يوم غير عن الثاني

اليوم جدولي:

وجبه خفيفه قبل الفطور: تفاحه او عنقود عنب (انا ماكليتهن لني نشيت متأخره)

الريوق:
كوب حليب طازج بالزعفران +3 ملاعق فول + 2 سليس اسمر كامل الألياف

وجبه خفيفه:
برتقال

الغداء :
4 ملاعق عيش أبيض + سمج + سلطة

و بعدين بكل في فتره المسا

وجبه خفيفه:
1 حبه مانجو

العشاء
خيار أو خس + 2 قطعه جبن قليل الدسم أو مرتديلا + نصف كوب شوربة عدس + 2 سليس أسمر

AM.SA.CHANNEL يقول...

تحسبت نفس الشي .. يالله كملي زين تسوين

AM.SA.CHANNEL يقول...

صح شربي مااااااااي قد ما تقدرين

Mrs. Purple يقول...

هههههههههه عيبتني الهنديه ما عندها مشاكل قبضت الغرشه واشربت

الوايت تي من سنين خذته من الامازون وما شربته غير مره وحده انا اي شاي بشكل عام ما احبه وعطيته هديه حق الوالد وهزآني اخذ شي ما اباه والغرين تي الحين مرتاحه على اللي اخذه بعد من الامارون طعمه مب مر ولا قوي فمستمره عليه

الحين مشكلتي الكبيره هي الرياضه من كم سنه كنت العب ساعتين او اكثر في اليوم بروحي احط ديفيدي والعب الرباضه كان جسمي غيييييييير بس الحين رغم انه وزني نقص الا اني ما العب رياضه صايره فيني هيازه غير طبيعيه

ما بشترك في نوادي لاني كنت اشترك وما اسير ما احب الزحمه وبعد هيازه

لو اقولج كمية ديفيديات الرياضه اللي عندي فوق ال ١٥٠ دي في دي من غير مبالغه من اسمع عن دي في دي الريفيوز ماله عالي ويمدحونه اشتريته وركنته

جد الرياضه تغير النفسيه والجسم وانا شفت هالشي بعيني بس الحين ما ادري كارهه شي اسمه رياضه

AM.SA.CHANNEL يقول...

Mrs. Purple

إنتي ذكرتيني ب علايه بتشوفين ردودها، كانت تردي عليه في مدونتي الأولى و ترد هني تلاحظين ردودها أول شي فيها تشاؤم و الحين ما شاء الله العكس، و بدت المشوار، و أنا أباها ترد تقولج كيف كانت و الحين كيف ..
ها شي عادي ..
لأنه عندج 150 دفيدي ما بتسوين شي، إنتي يوم كنتي تسوين قبل الدفديات يمكن كانن معدودة، ترا كثرتهن مشكلة، و ما تعرفين شو تسوين أو أي واحد تتنقين، أنا مجربة و ما تسوين شي، ف عشان جي أقلج إختاري 1 و فري الباقي أو عقيهن في مكان إنتي ما بتوصليلهن، لازم تتخذين قرار أي دفيدي تسوين و يكون واااحد بس لا غير ..

الشي الثاني إنتي الحين، بما إنج متهايزة إبدي بالمشي، 20 دقيقة في الفريج و شوي شوي زيدي 30 دقيقة و جان حد بيسير وياج زين، لأنه بتتحمسون، و لا تنسين المشي يعدل المزاج و يخليج متفائلة أكثر و تبين تعطين أكثر يعني بيشجعج على الرياضة..

دخلي يوتيوب و شوفي الناس اللي كانو متان و ظعفوا بتتحمسين وايد أو شوفي لقطات من the biggest loser
إنتي يوم بتشوفين الفيدوهات بتلاحظين إنه الفيديو يبدا يقنع العقل على الرياضة و يبدأ يتحمس شوي شوي و عقب إنتي تتحمسين، و لازم تخصصين ساعة تحددينها حق الرياضة مثلا الساعة 11 الصبح .. عندج ساعة من 11 لين 12 رياضة ..

و حاولي تسوين حق عمرج جو تعطين نفسج مكافأة إذا مثلا قدرتي تسوين رياضة و ما توقفين، أو نزل وزنج ..
و جان حد بيدخل وياج منافسة حلو بعد، و دوري بلوقات تهتم بالهسوالف بتتتغيرين شوي شوي ..