الأربعاء، 6 أبريل، 2011

يوم الثلاثاء



طبعا أنا بادية من الأحد لكن بادية أسجل مذكراتي من الثلاثاء و البارحة رقدت من وقت و ما وحالي أكتب شي .. 

كان يوم الثلاثاء حلو عليه، نشيت الساعة 7:30 و سرت أتريق، و لأنه ناشه متأخرة ف ريوقي ما كان عدل بس مب مشكلة، كلت خبزة و بيضة و عصير و في السيارة شربت حليب.. لأني أحتاج طاقة و أحس هاللي كلته مب وجبة ريوق لأنه عندي كلاس رياضة في النادي الساعة 8:30  يعني بسرعة بسرعة .. 

و كان الكلاس   body combat





و كانن مدربتين يدربون، بس شو ما عرقت و كان متعب بعد، أصعب عن المرات اللي طافن، و هم قالوا هالمرة تراه أصعب، لكن كان وااايد حلو، أحب الكلاسات اللي فيها أكثر من مدربة يسوون جو في الكلاس و ضحك، يعني لو اتعب بس المهم إني مستمتعة .. 

و طبعا بعد الكلاس كنت أبغي أدخل كلاس ثاني بس حسيت إني مرهقة جدااااا .. مارمت .. 

و على طول سرت عند العصير و طلبت
 wheatgrass


طبعا طلبت واحد مب ثنين، و طعمه مررر، ومرة ياني شوي شكري، و بقولكم بعدين عن فوااايده، لو بس تعرفوون فوايده، بتشربووونه حتى لو طعمه خايس .. و تدرون كم فيتامين فيه 103 .. بعدين بخبركم هذا يباله بوست كامل .. 

و عقب سوينا كلاس يوجاو كان على البحر رووعة كان بس حر شوي، لكن إستمتعت، بالذات يوم قالت حسوا بالهواء يوم يلامس ويووهكم، شعوور و لا أروغ ..

و بعدين مريت و يا بنت خالوه، السوبرماركت، نشتري أكل، لازم نغير طبيعة أكلنا و نحاول نكون صحيين أكثر .. 

و بعدين مرين سب وي .. كانت الساعة 1 قلنا بنغير هالمرة بناكل من برع .. 

أنا طلبت ميت بول 6 إنجز  مع خضرة و أول مرة آكل لحم مالهم لذييذ طلع .. و طلبت سلطة 

بنت خالتي طلبت تركي 12 إنجز





رديت البيت و أنا حاسة براحة، و الصراحة كنت مستانسة لأني شربت wheat grass  لأنه وااايد صحي و فوايد ما بتتصوروونها أبدا ..  
طبعا العصر كلت قوطي روب بالفرولة، و كلوا شوي شوي عشان تستمتعووون هههههه .. 

لكن المغرب خربتها ، كلت ميني كب كيك، يمكن 4 حبات أو 5 هههههه، و كلت سندويش صغير شورما مع شوربة أهم شي الشوربة ههههههه.. 

و آخر شي سرت مشيت مشي عادي في الفريج يمكن بس ربع ساعة و رديت .. 
----------------

وايد أشياء إستفدت منها اليوم .. 

1. كل ماجربت شي يديد صحي، كلما دخلت أكثر في هذا العالم و إستمتعت به، و تتمنى غيرك يكتشف هالعالم 
2. فيني طاقة سلبية ما أطلعها في أي شخص، أسوي رياضة و بتطلع بروحها .. 
3. أشرب ماااااااي ماااااااااي مااااااااااااااي واااايد قد ما أقدر .. 
4. مب يعني خبصت جدولي يعني نهاية العالم، بالعكس، هذا تحدي بيني و بين جسمي، مرة أنا أفوز عليه و مره هو يفوز عليه، لكن  ما أخليه يغلبني دوم، لازم دوم أنا اللي أكون فايزة، " خل روحك رياضية "

هناك 11 تعليقًا:

DoDoq8 يقول...

شلون تاكلين وبعدها بساعه ملاس احس تعب على المعده خليها ساعتين احسن


وسبواي غراامي اذا يوعانه اخذ 12 انش :P

علايه يقول...

ما شاء عليج، بالتوفيق ان شاء الله

أحس حلو النادي مالج، خاصه انه اليوغا برع

بالنسبه للعصير wheatgrass، تعرفين اذا يتحصل برع ام ممكن اسويه فالبيت؟

وشهيتيني بالسب واي،فاليوم المفتوح بسير بخذلي هاي السندويشه

أنا أمس بديت الدايت، بديت مع دكتور تغذيه، نظامي نوعا ما صارم،و فيه وايد التزام، لنه عندي 20 كيلو لازم اخفهن، اعترف انه ايام زمان فالفتره اللي خفيت فيها كان نظامي صحي و مناسب لحياتنا اليوميه،بس بعدين وصلت مرحله ثبت فيها وزني وما نزل، فاكتئبت و قمت أكل الأخضر و اليابس و رد وزني زاد،
بقولج عن نظامي أمس
بداية اليوم:تفاحه
الفطور:كوب حليب + 2 سليس أسمر +سلطه+1 بيض
سناك: 1 برتقاله
الغداء: دجاج مشوي مع بطاطا مشويه
سناك: بطيخ أحمر (يح)
العشاء:لبن أب +سلطة+ملعقتين لبنه+2 سليس أسمر+تونه

تصدقين و أنا أكتبه ما أحس انه كان قاسي،بس يمكن لنه أمس كان أول يوم حسيت انه قاسي شويه

نظام الدكتور، 4 أيام تقريبا نفس هذا اليوم،بس فيه تنويع، وعقب 3 أيام يكون بكميات شويه أقل، وعقب يوم مفتوح

قاللي بس أول اسبوع من الدايت مافيه مشي،يبا يشوف استجابه جسمي كيف، ومن الاسبوع الياي ببدأ مشي من 4 إلى 5 مرات اسبوعيا

و فالنهايه مشكووووره وايد على البلوق، انتي شجعتيني أنه ارد للدايت من بعد انقطاع أكثر من سنه

AM.SA.CHANNEL يقول...

DODOQ8

كنت ناشة متأخرة عشان جي، و أنا هالكلاس ما أبا أفوته إلا أسيرله و عشان جي كلت خفيف، و كثرت من السوائل ..

و أنا بعد أحب سب وي، بس لأنه طالبة سلط ما رمت أطلب 12 انج ..

و شكرا على ردج,,

-----------------------

علايه

النادي اللي أسيرله نادي دبي للسيدات ..

أنا بس أبا اعرف شي واحد ليش هالأخصائيين يتحسبون نحنا عبارة عن حلووج، هاي مسألة برمجة عقل، و أصلن طبيعي بتشوفينه شوي، لأنه تقولين بس هذا آكل، و المفروض يعطونا على طبيعة أكلنا مب أكلهم..
بس علايه إلتزمي هالمرة، لأنه نظام الكسر أو النظام المفتوح وايد زين يثبت الوزن .. و الله يوفقج إن شاء الله .. و كملي لاااااا توقفييين مهما إستوى و حتى لو خربطتي في الأكل لا تستلسمين في مخارج ..
بس إنتي يوم بتسيرين عن الدكتورة المرة الياية، قوليلها أنا أبا وزني ينزل، لكن أبغي نظام يطابق أكل حياتنا شوي، على الأقل ما تحسين إنج في عالم و هلج في عالم، ليش أقولج هالكلام لأنه تي فترة تشتهين أكل البيت، و و إذا هي حاولت إدخلج أشياء معينة إنتي ما بتحسين في فرق بين أكلج و أكلهم يعني بتمشين عادي، بس دايما قولي هذا روتين حياتي.. برمجي عقلج .. عشان ما يتعبج ..

و بالتوفيق إن شاء الله، إن شووفج دوم هني تكتبين لنا يومياتج ..
و نفس ما قلتلج يا عليا سجلي كل شي و شو حسيتي، هالشي بيرفع من معنوياتج واايد

علايه يقول...

ان شاء الله انا هل المره بلتزم/ انا قلت ماعليه، خلني اضغط على عمري هذا الشهر و بشوف شو النتيجه

وبعدين هيه الا فتره و بتعدي، و عقب ببدأ نظام صحي يناسب حياتي اليوميه، انا امس ياني احباط،فتحت الثلاجه و شفت 3 اصناف من السويتات، و انا اموت في أي شي حلو، بس الحمدلله قاومت، احاول اذكر عمري بالهدف اللي ابا اوصله،تدرين، شي ثاني مشجعني، عندي زميل معايه فالدوام، وايد صغير فالسن بس ما شاء الله وزنه فوق 150، سمعني اكلم البنات عن رجيمي،و عقب يا و سألني عنه، عمره ما سوا رجيم في حياته، ولا حتى حاول،تعرفين شو سويت؟،مسكت التلفون و سويتله موعد،و راح عند الدكتور، و رد من عنده و هوه حاس انه متحمس واااايد للفكره، فعشان نشجع بعض، بداية كل يوم يقوللي شو كان معاه الدايت فاليوم اللي قبله، و يقوللي يا عليا لا تخربين،تراج انتي اللي شجعتيني على انه اغير حياتي، انا واااايد مستانستله انه بدا الخطوه الاولى،الحين كل ما بيي اخرب اتذكره

ادري انه نظامي قاسي بس فيه كل اللي يحتاجه جسمي،

تدرين فالفتره اللي قبل لا ابدأ فيها الدايت،و لمدة شهور، تقولين كانت عندي مهمه انتحاريه ويا الأكل، يمكن كنت خايفه افقد الاكل، ماعرف شو سالفتي، المهم، كنت اتريق فالدوام من برع،كله فطاير و سندويشات فلافل و هالسوالف، و بين الوجبات بسكوت و كاكاو او اي نوع من انواع الكيك، و انا راده البيت، اخذلي سندويشه من ماكدونالدز او برجر كنغ او اي مطعم، طبعا كله مقالي، و العشاء اطلبلي وجبه دسمه او اتعشى في مطعم، و قبل لا ارقد شبس كمن نوع ويا مكسرات و شاني و كاكاو

صدق مهمه انتحاريه

طبعا زاد وزني، وخلي زيادة الوزن على صوب، ارتفع عندي الكولسترول و الدهنيات، و احس ويهي غدا جني كبرت 10 سنين، و صار مبين عليه التعب

مابا ارد ابد لهل الحياه، ابا افتح صفحه يديده في حياتي

AM.SA.CHANNEL يقول...

علايه

أحسن شي قلتيه " أبا أفتح صفحة يديده في حياتي " و هذا المهم .. و هذا الشي بيخليج تكملين، و الأحلى إنج ألهمتي شخص وياكم في الدوام، و بدأ يسوي، و الحين إنتوا الثنين بتنافسون بعض .. و إن شاء الله بتوصلون للوزن اللي تبونه يارب .

تدرين و الحلو فيج الحين، إنج متحمسه مهما كان رجيمج بتكملين، قبل أحس يوم تكتبين متشائمة و تبين لكن مب عارفة شو تبين ...
لكن الحين بان عليج التغيير .. و إستمري و كتبي اللي تبينه هاي الصفحة صفجتح و كتبي اللي تبينه ..
الله يوفقج ..

و صح ترا الحين في إنسان يشوفج إنتي قدوة و كوني القدوة لا تخربين لأنه إذا هدمتي كل شي هو بيهدم وياج .. و إحساس حلو يوم حد يتبعج .. و هالشي بيحمسج أكثر و أكثر

علايه يقول...

هيه، والله انا صدق احس اني متحمسه، و اصلا هذا الريال قاللي، اذا خربتي تراني بخرب

و هذا اللي عاطني دفعه اني اكمل

و عن قبل كنت صدق قمة الاحباط، حسيت انه حرام اللي اسويه في جسمي و معدتي،بس الحمدلله،تغير الحال

AM.SA.CHANNEL يقول...

الحمد الله، إستمري و كلنا وياج، و لو تفتحين مدونة بعد تشجعين عمرج فيها، بعد بتحسين غير ..

Mrs. Purple يقول...

يا حظكم في دبي عندكم نوادي مثل العالم نحن كمن نادي ومدحوب وانا وحده ما اداني الزحمه

عن الويت غراس طبعا لا يمكن احصله في بوظبي كنت بخذه كبودره من الامازون واسمه سوبر غرين بس خفت يكون طعمه مب حلو وما اكمل وياكثر ما خذت وعقيت

AM.SA.CHANNEL يقول...

Mrs. purple

ويت جراس لو تعرفين فوايده بس أنا يالسه أقرا الكتاب الحين، إن شاء الله من أخلص بخبركم بالفوايد ..

و حتى لو كان طعمه خايس و هو طعمه لوعه بس يعطونج كوب صغير و تشربينه و يعطونج عنص أو أي شي شكري عقبه عشان يخوز الطعم ..
لازم تتحملينه، بس شوفي دام إنج تقدرين تسوينه في البيت سويه ترا سهل أنا بادية أسويه ..أكثر صحي من البودرة

خاتون يقول...

السلام عليكم...

عجبتني آخر جم نقطة
عاد أنا هالأيام متوليته صبواي بما انه يم الجامعة بردتي فزاد وزني خخخخخخخخ ويبيلي أغلب جسمي وأقاومة المغريات وأشرب ماي "قدر ما أقدر" ههههههههه هاذي حلوة قدر ما أقدر ككويتية تضحكني خخخخخخخخخخ ههههههه

موفقة حبيبتي ^_^

AM.SA.CHANNEL يقول...

خاتون

ههههههه ليش يعني إظحك قد ما أقدر ههههه ليكون عندكم جملة منقعة خخخخخخ

شربي شربي ماي و يالسلطة لول