الجمعة، 23 سبتمبر، 2011

و بدينا النظام اليديد



السلام عليكم شخباركم ..

و الله لهيت الفترة اللي طافت وايد كنت مضغوطة، و كل شي عندي يبالها تصليح هههه اللابتوت و شكلي و تليفوووني .. مقطوعة عن العالم .. !!


المهم بخبركم عن نظام الصدمة، أنا الصراحة عمري ماعرفت لهالنظام و عمري ما توقعت إنه بيي يوم و بصدم جسمي ..

الجسم بعد ما يخسر وزن معين يعلق و ما يتحرك و يتم ثابت و شو ما أسوي من الرياضة ما يتغير .. ليش؟ لأنه الجسم تعود على نظام معين و تعود على أكل معين، مستحيل يتغير و أنا 4 شهور رياضة عادي بالساعتين أو الثلاث يوميا ما عدا الجمعة و أكلي عدل أحافظ عليه ..

لكن إكتشفت بعد الصدمة إنه هناك عادات نتبعها نعتقد إنها صح و هي في الأساس غلط، و إكتشفت إنه الجسم ما أعود على شي معين إذا بغيت أظعف ..


أنا ما عرفت هالشي إلا من المدربة يوم قالتلي لازم تصدمين جسمج و لازم مدربة عشان تقدرين تصدمينه، و حطيتها في النادي و بديت وياها و كل يوم تسويلي تمارين تختلف عن التمارين اللي قبلها، و كانت توزني كل يوم عشان تعرف وزني نزل أول لا ؟؟ فكانت تستغرب إنه ماينزل بالكيلو و هي متوقعه إنه ينزل كيلو على اليوم الثاني أو الثالث بس كان ينزل جرامات و الوزن نفس ماهو..

و أنا ما كنت مسويه نظام صدمة لأكلي و المفروض إني أسوي، و كنت ماكله من سب وي وقالتلي تقطعين الخبز هالفترة و علامة إكس و ممنوع أتقرب من هالثلاث أشياء العسل و الفواكه و الخبز المغرب .. لأنه هو السبب و هو اللي مايخلي وزنا يتغير..

و تخيلوا أنا كنت راده تعبانة و ماتعشيت بس شربت حليب فيه عسل وقالتلي هالشي غلط و مابينزل و تخيلوا بمجرد ما إني قطعت الخبز هالأسبوع و قطعت الفواكة المغرب و العسل جسمي تغير و نزل 3 كيلوا ..

و لازم أغير في الريوق أتريق كل يوم غير عن الثاني .. أنا متعودة أكل كورن فلكس الصبح قالتلي كل 3 تيام مرة آكلة ..
و كنت مستصعبه كيف آكل روب على الريووق أحس شي غريب .. بس الحين تعودت أحسبه عادي و بالعكس أحس ساعات أحسن عن الأشياء الثانية آكل روب مع موز اليوم الثاني كورن فلكس اليوم الثالث 2 بياض البيض مع أي شي تبوونه ..

الحين قالتلي مسموح الخبز لكن بحدود .. و أنا شو سويت البارحة لأني من عشاق الخبز خبصت و كانت عنا يمعه البارحة و كلت خبز .. بس الحين بأدب عمري و ما باكل خبز هالإسبوع عشان أتعلم و ما أخبص .. بالذات العشا إكتشفت إنه هو أخطر وجبه الصراحة .. المفروض نتعشى الساعة 7:30 مب 9 أو 10 من جي ما نضعف ..


و على فكرة كل شي تغيريييينه يوم بتاكلين أنا هالمرة كسرت شربت سكيمد و احين أشرب لو فات يعني أنوع ..

و أنا أنصح كل وحده عقت واايد من وزنها و ثبت ما تحرك تسوي نظام الصدمة في الأكل و في الرياضة و أنا أفضل مدربة في الرياضة و الصراحة بتلاحظووون النتيجة ويا المدربة حتى الجسم يتغير ..


و حتى اللي الحين يسوي يجرب ينوع في الرياضة لأنه الجسم يوم كل يوم تنوعين الرياضة وياه مثل اللي تفاجئوونه فالجسم يستجيب بسرعة ...



السبت، 17 سبتمبر، 2011

إنشر تضعف أكثر




السلام عليكم ..

إكتشفت إنه مثل مدوناتنا صعب تنلقى، و بالذات إذا كانت متخصصه بالرجيمات و يومياتنا مع الرياضة و الأكل ..

ف عشان جي قررت إنه قد ما نقدر نجمع كلنا هالمدونات  و كل وحدة تنزل بوست إذا تبغي طبعا و تحط لينكات المدونات مب المواقع أو المنتديات ...

المدونات المهتمة بهالسوالف ..و يمكن هم موجودين لكن مايبينوون، لأنه صدق أنا ما أصدق ألقى حد مختص و يكتب يومياته، و هالشي يساعدنا وااايد إنه نكمل و نوصل للوزن المثالي، و لو يووم يأستي  أو خربتي، بتلقين التشجيع منا ..


فأنا أشوف هالشي واايد زين و بنكتشف حتى مدونات يداااد ما كنا ندري عنها ف عشان جي اللي يبغي ينزل بوست  بالمدونات المهتمة بهالمواضيع

و الحين ببدأ ضغطوا على الإسم عشان تدخلون المدونة ..






 

و جان أرد



و الله ما أتخيل كيف جي، مرن الأيام بسرعة و كنت مضغوطة ويا الشغل، و ما أعرف شو سالفة لابتوبي كله يعلق و ملوعلي بجبدي .. و كله يعلق، وإستويت لا أيلس على الابتوب و لا التلفزيوون .. و أحس صدق مضيعه من متى ما دخلت هني ..


أخباركم علوومكم .. شو يديييييدكم ..  و أخيرا رديت و عندي لكم سوالف وااايد .. !!! بس صبروا عليه شوي أبا أتنفس شويه ههههه ..