الثلاثاء، 7 يونيو 2011

اليوم الخامس و اليوم السادس .. " و شكرا جروبي "

المفروض أكتب اليوم السادس، لكن إنشغلت .. و لازم أقولكم شو سويت في اليوم الخامس قبل و بعدين بنتكلم في اليوم السادس إللي هو اليوم ..


و الصراحة ما أبا أتكلم عن الأكل شو كلت و شو ماكلت .. لكن أبا أتكلم عن شو أحس الحين ..
ما أقدر أتريا لين باجر .. باجر بزيد شوي في الفوايد هههه ..

البارحة اللي هو اليوم الخامس، إستغربت من شي، و كانت عنا حفلة بنت خالوه، و إستغربت إني مووول ما إشتهيت الكيك، مع إنه شكلها لذيذ لكن ما إشتهيتها .. يعني مب نفس قبل يوم أشوف الكاكاو و الكيك أحس أبا آكل لا بالعكس .. تغير كل شي ، و كانوا مسوين فطاير و أشياء فيها دياي أو يكون فيها حليب أو زبد أو جبن، لكن يوم أشووفه ما أشتهييه .. و أكون يوعانه بس أدور شي مافييه هالسوالف، و على حظي كلت سوي رول كان لذيذ كلت 6 حبات ههههه، و كلت ورق عنب .. 

و الله أشوف الكاكاو و ما أحس إني متشجعه أبا آكله عادي عندي العيد .. مب مهم آكله أو لا ..!!

أما بالنسبة لليوم

شفت المدربة اللي خبرتكم عنها فيجي .. يوم قلتلها إنه اليوم السادس لي و أحس صدق جسمي غير، قالتلي تسيرين وايد الحمام، و أنا كنت شوي زايغة من سيرة الحمام لأنه صدق وااايد تسيرين الحمام، قلتلها هي و حتى إختفى الإمســاك، قالتلي هالشي عادي، لأنه وايد تكثرين من الألياف .. 

 و أحس بعمري خفـــيفة، و نزلت كيلوا ..  !! و حتى نفخت البطن خفت عندي و ما أحس بصاهر عقب الأكل وااايد أشياء تغرت فيني .. 

لكن في عيب واحد أحس طاقتي خفت عن قبل، بس أعتقد لأنه ما ألقط و أيلس آكل مني و مناك، و ثاني شي أحس هالنظام يحتاج أكل و ترتيب، و تتبرظين له صدق .. و يحتاج صبر و أحس لازم إدخلين العصاير فيه عشان الطاقة طبعا مب أي عصير لازم إنتوا تسووون العصير .. !! 


و على فكرة البارحة كلت شيبس ما أدري إنه بنكهة الجبن يوم كلت نصه إنتبهت .. و إنصدمت كيف ما إنتبهت، و ما حسيت بالطعم شكلي نسيت طعم الجبن ههه..


و أما عن جروبي .. 

Tammyfav
ME ON DIET
علايه 

لولا الله و لولاكم يمكن أنا ماقدرت أكمل، لأنه أول مابديت و كل ما أشتهي شي أتذكركم، و أقول لا مايستوي لازم ألتزم و هم ملتزمين، أدري إنكم خبصتوا من الخاطر بس على الأقل قدرتوا تسووون لو يوم أو يومييين على الأقل حاولتوا .. و في أغلاط ها شي طبيعي .. 

و أنا كنت جابره عمري إني ألتزم، لأني أعرف إذا خبصت كلكم بتخبصون وبتوقفووون .. و أشكر مي أون دايت اللي الله يعينها الصراحة قالت بوقف و لاعت جبدها من النظام لكنها ردت و كملت عاده هي إلها اليوم السابع .. !! ما نعرف شو التغييرات اللي حست فيها .. بتخبرنا إن شاء الله 

لكن و الله أشكركم وااايد واااااااااااااااااااايد ..


هناك 3 تعليقات:

علايه يقول...

AM.SA.CHANNEL

العفو حبيبتي ، والله المفروض أنه احنا نشكرج على فكرة الأسبوع النباتي وعلى هذه المدونه

تدرين لولا هذه المدونه جان ما رديت عرفت درب الدايت

بس والله أخيرا أحس انه انا موب بروحي

قبل كنت أدخل المنتديات، بس مشكلة البنات انه مفهومهن عن الدايت غلط، عشان جيه ما حبيت اكون معاهن عالخط


بس الحينه أحس اني حصلت اللي ادوره

حصلت الدافع

تدرين، كنت اقول للكل ، انا ادور عالدافع اللي خلاني قبل اخف وزني بس موب محصلتنه

بس الحينه حصلته و تشجعت أكثر

بالنسبه للتغييرات في جسمي:
1- خفيت كيلوين و نص، و أنا متأكده لو التزمت 100% جان خفيت أكثر
2- أسير الحمام وايد ولله الحمد
3- احس بشرتي أحلى، و ردت النظاره حق ويهي( صدق انه الفاست الفود و الدهنيات مرض)
4- الشي الغريب و اللي متلاحظ انه خف السواد تحت عيوني، انا صح استخدم كريم بس ما كان وايد عاطني نتيجه،بس الحينه احس السواد خف، طبعا لنه اصلا صايرلي بسبه نقص الفيتامينات و المعادن، و هذا النظام كنت وايد اكل فيه خضره و فواكه

5- أحس عمري وايد خفيفه، وصدقييييني، انا لو وزني فالثمانينات بس أنا حركتي ثجيله بالقو، جنه وحده وزنها فوق ال 100، بس مع هل النظام حسيت عمري خفيفه، و هالشي اللي صدق صدق اقنعني اني لازم التزم بنظام غذائي و ما أرد لعاداتي القبليه، انا قبل كنت امرضه بنفسي، و مدمنه اكل ثجيييييل و المشكله ما كنت استسيغ الا الاكل الثجيل و اللي متروس زبده و دهن

أنا خبرتج انه اليوم اوبن داي، و قبل لا ادخل امتحاني الفاينل اتريقت في ستار بكس كرواسون جبن، و حسيت عمري ثجييييله، قلت فخاطري انا ليش اسوي فعمري جيه؟، ليش ما اهتم بنفسي و بصحتي، و حسيت بتأنيب الضمير، بس خلاص ،بخلي اللي صار اليوم ورا ظهري، و ببدأ بدايه يديده

سوري ، ادري اني طولت،بس فيه وايد اشياء ابا اقولها، انا الحينه يالسه أطبق قانون 21*14

التمرين انه تكتبين الكلام اللي تبينه يتخزن في عقلج الباطني 21 مره ل 14 يوم

مثلا أنا اكتب ( انا ملتزمه بنظام غذائي صحي و مرتاحه معاه)

هنيه تفاصيل التمرين
http://www.ibtesama.com/vb/showthread-t_28977.html

انا متأكده انه اذا تحكمت بالمخ بتحكم بكل شي يدخل معدتي

غير معرف يقول...

انا مقهوره اني ما قدرت التزم وايد بسبب انشغالي فبنتي وبعد بسبب الرضاعه الطبيعية اللي تخليني اشتهي اشياء دسمه +_+

وفرحانه وايد عشانج

و ذكرتيني بعمري قبل كم سنه سويت رجيم وصرت لما اشوف الكاكاو اطالعه ببرود وما احس اني اشتهيه و اكلات كثيرة ماقمت اكلها

انا اذا صار عندي وقت بعدين بنزل البوست عن تجربتي فباجي الايام


وفيه كلام كتبتيه حسيته نفس اللي كنت ابا اقوله

"لكن في عيب واحد أحس طاقتي خفت عن قبل، بس أعتقد لأنه ما ألقط و أيلس آكل مني و مناك، و ثاني شي أحس هالنظام يحتاج أكل و ترتيب، و تتبرظين له صدق .. و يحتاج صبر و أحس لازم إدخلين العصاير فيه عشان الطاقة طبعا مب أي عصير لازم إنتوا تسووون العصير .. !!"

هالكلام هو بالضبط اللي كنت اقوله حق نفسي

AM.SA.CHANNEL يقول...

علايه

بالعكس، العفو و أنا ليش سويت هالمدونة عشان أشارك الكل و أشارك كل شخص يبا مساعدة، و أبا الكل يرمس و يعبر، لأنه يوم تعبرين ترتاحين و تكملين و تبين حد يشاركج عشان تتشجعين و تكملين .. !!

و أنا كنت شراتج المنتديات صح إستفدت منها لكن أنا الجمد الله إني ما تأثرت و كنت أجرب كل شي و أسوي اللي يسوونه البنات في المنتديات، يعني في أنواع ريجيمات دمـــــــار.. بس الحمد الله

و الله ماتدرين كيف مستاااانس على النتايج اللي حصلتي عليها ماشاء الله عليج، و أهم شي تحافظين على هالكيلوين .. و ماشاء الله في إسبوع و شي حلو .. و الأهم تحسين حركتج خفيفة ..

و إنتي لو تقرين بوستاتي الجديمة و تشووفين ردودج و شو كنت أرد عليج أقوولج لازم تتحكمين في عقلج قبل بطنج نحنا تعودنا نربط بطونا مب عقولنا و العقل هو اللي يتحكم، و على فكرة في فرق بين ردوودج قبل و الحين قبل متشائمة الحين العكس حتى شوفي و بتلاحظين و هالشي وايد مفرحني ..

---------------------------------

Tammyfav

إنتي ما ألومج عندج بيبي و ترضعين، لكن تدرين الحلو فيج إنج حاولتي و كنتي ماشاء الله مستعده ..

و أنا عشان جي ما ألومكم اللي ماقدر يستمر وقف و اللي وقف و رد كمل و اللي لخبط.. و أنا كنت يوم أتبرظ و يوم ما أتبرظ أهمل و أحس طاقتي تخف، و إنتي أم و ترضعين أكيد تحتاجين طاقة ..

بس و الله ماتدرين كيف أنا إستانست يوم شفتج منزله إستعدادج و أول يوم و ثاني يوم، على الأقل إنج غيرتي و جربتي و حاولتي و هالشي عطاني أنا دافع ماتدرين كيف، حمسني، و إنتو كنتوا لي دافع كبير .. ولوولا الله و لولاكم يمكن ماكنت بكمل ..