السبت، 14 مايو 2011

معلومة على الطاير


ماتدرون كيف راسي كان داير من يومين، أحس إنصدمت من شيئين و أول مرة أتأثر هالكثر، مع إني ما أهتم لكن هالشي أثر فيني لكن في نفس الوقت الحمد الله أظفت معلمومات يديده لقاموسي الصحي و الرياضي .. 

أول شي أنا وايد أحب أسوي رياضة، و إذا ما سويت رياضة أتعب، أحس الرياضة إستوت مثل المخدر في جسمي، ما أرتاح لين ما أسوي رياضة، ما أعرف كيف أوصفلكم الإحساس، لكن ما عندي مشكلة أيلس أسوي رياضة 4 ساعات عادي .. و أنا أحب أدخل كلاس و را الثاني .. طبعا مب كله كارديو مثلا يكون كارديو عقب شد للعضلات و بعدين رقص أو بعدين يكون كارديو .. 

المهم كنت أسولف ويا وحده من ربيعاتي صدمتني يوم قالتلي إنتي غبيه تسوين رياضة أكثر عن ساعة، قلتلها عادي لأنه الرياضة ما بسوي بس حرق تراني أحر و أشد في نفس الوقت  و أريح عضلاتي 

قالتلي غلط المفروض ما تسوين هالشي لأني أنا أرهق عضلاتي و ما أعطيها راحة ..
قلتلها لكن أنا يوم الجمعة أريح، و أنا مب 24 أسوي رياضة أنوع في رياضتي .. 
قالتلي لاااا المفروض ساعة و خلاص .. و عقب عضلاتج بتتعب و ما بتحرقين .. 

أنا إنصدمت الصراحة عمري ما سمعت بهالمعلومة و المشكلة إنها سألت مدربين قالوولها إنه كلامها صح.. 

ما تدرون كيف إكتأبت و الصراحة كنت زايغة إني أوصل لهالمرحلة بس قلت مستحيل الحين المدربات في اليوم كم يدربون و من غير يدربون عمارهم، و أنا أحس ما تكفيني ساعة إذا كارديو ساعة متى أشد جسمي ..؟؟

المهم و الشي الثاني اللي صدمني أكثر كنت أشوف فيديو ل الدكتور الرائع عبد الله المطوع و أنا أقول ليش me on diet متخبلة عليه، و الصراحة فناااان بمعنى الكلمة، لكن هو في هالفيديو ما وضح هالشي و سوااالي الرعب البارحة فليل مااارقدت هههههههههههه

الله يسلمكم كان يتكلم إنه في ناس يضعفون و فجأة يردون لأجسماهم و الأسباب ف قال هالناس يا إنهم كانوا يخسرون السوائل في الجسم أو كانو يحرقون العضلة مب الدهون ف يرودون لأجسماهم بسهولة .. 
ف أنا هني إنصدمنت شقى أعرف إني يالسه أحرق العضلة مب الدهون .. تميت طول الليل أفكر و أفكر في الرياضة .. و الله كنت أحس كأنه جزء من جسمي بخسره هههههه و اللهكنت متأزمه البارحة، 
المهم سرت النادي حتى متأخرة اليوم و دخلت كلاس core power شد البطن و body balance اللي نزلت عنه مرة .. 
و بعد ما خلصنا على طول سرت عند المدربة و ضايجة أبا أعرف أبا حد يفهمني أحس فجأة كل اللي قريته و تعلمته كله إختبص .. المهم .. 

قلتله عن الفيديو اللي شفته، و أنا فهمتها قلتلها أنا مب عارفه الرياضة اللي تحرق العضلة شو و اللي تحرق الدهون شو، لأني أحيد الرياضة تنمي العضلة و تحرق الدهون و المشكلة الفيدو كان مب كامل ف ضعت .. 

ف قالتلي، الناس اللي ماتاكل و تحرم عمرها من الأكل و تسوي رجيم قاسي هذيل يوم يسووون رياضة بدال ما يحرقون الدهون قاعدين يحرقون العضلة و بعدين يتعبون لأنهم تعبوا العضلة وما حرقوا الدهون اللي في الجسم.. ف يردوون نفس ما كانوا بسرعة أما  إذا إنتي تاكلين عدل و موازنه في الأكل و تاكلين أشياء فيها بروتينات و أكلج صحي  و محافظة ف إنتي هني يالسة تحرقين دهون و تنمي العضلة في نفس الوقت .. 

ماتدرون كيف إرتحت 

بعدين سألتها عن الرياضة هل إذا أنا تجاوزت عدد معين خطر على عضلاتي 
إستغربت يوم قلتلها هالكلام، قالت أبدا ما يخصه قالت إذا إنتي ممكن تعطين عطي، جسمج يتحمل رياضة دخلي مافيها شي .. و قالت و إنتي مب كله بتسوين كارديو إنتي يالسه تنوعين .. و أنا بالتمارين أعزز عضلاتي و أقويها بالذات إذا كنت آكل عدل و و آكل أشياء فيها بروتينات عشان تنمي العضلة و تقويها و ماتضعفها .. 

والله إرتحت يوم تمت تكلمني إرتحت رااااحه، و الله لو تشوفون ويهي شقى إستوى هههه ..

بس الحين إرتحت قلت لا بسمع كلمة مني و لا مناك أنا بروحي بدور على المعلومة.. 
بس عن الدكتور الصراحة ممتاز بس المشكلة الفيديو ما وضح ليش و المشكلة إذا كان لقاء،  المذيعين يقاطعون ويشوشوون المعلومات .. !! فتلقط نص المعلومة .. 

بس أهم شي إنها قالت سمعي جسمج، إذا تحسين إنه يقدر اليوم يعطي أكثر خليه يعطي لكن تحسين لا سوي اللي تقدرين عليه .. 
و أهم شي إرتحت من مسألة العضلة إنها ما بتتعب دام إني أتغذا عدل، و العضلة ما بتحترق لكن الدهون هي اللي تحترق دام إني أسوي نظام صحي مب رجيم قاسي .. 

حبيت أضيفلكم هالمعلومة على السريع، لأنه أكيد حد نفسي مب عارف هالشي .. !!

هناك 6 تعليقات:

غير معرف يقول...

اول شي تسلم ايدج على هذي المدونه الحلوه من فتره انا اقراها بس ما قدرت ارد غير الحين

!! واستغربت من كلام ربيعتج .. ماحب الناس اللي تحبط
ويتفلسفون على خلق الله وهم مب فاهمين شي

و الله يخليلج هالنشاط ^_~

علايه يقول...

احيد ايام زمان المدربه لاحظت اني اتمرن ساعتين، قالتلي ساعه وحده تكفي ، وماله داعي تزيدين

قلتلها انا احب اسوي كارديو و بعدين تمارين شد

قالتلي نوعي ، مثلا 3 ايام شد و الباقي كارديو

---

و انتي ما شاء الله عليج حافظي على هالنشاط و الله يعطيج الصحه و العافيه

---

و بقولج شي ، فيه جهاز يكشف اذا الوزن اللي نقصتيه من العضله او الدهون، و اذا زاد الوزن هل هوه من العضله او الدهون او الماي فالجسم، انا كنت اسويه في كوزمسيرج و الحلو انه فعلا يساعد في انه تعرفين جسمج احسن
----

و عندي سؤال، اللي اعرفه انه البروتينات وايد مهمه للرياضه، بس شو دورها فالرياضه؟ و فيه بدائل بروتينات جربتيها ؟

AM.SA.CHANNEL يقول...

Tammyfav

هلا و الله فيج نورتي المكان، ربيعتي حليلها ما تحبط لكن أنا إستغربت من كلامها و هي كانت مصرة على الكلام لأنه سامعة مدرب و سألت مدربة و قالتلها صح لكن أهم شي إني إطمنت ..

آميـــــــــــن يـــــــــارب ..

---------------

علايه

و الله أول مره أعرف عن هالجهاز .. !! أنا الحين قلت خلاص ما بسمع المدربة قالتلي سمعي جسمج، إذا تحسين تقدرين تعطين عطي إذا تحسين جسمج مايقدر وقفي خلاص ..

و البروتينات هاي مهمة في فترة الرياضة و موجودة في البيض و الروب و الحليب السمج و البقوليات بعد .. و ممكن تاخذين المكملات الغذائية اللي تحتوي على بروتينات ..

البروتين مهم لبناء عضلات الجسم، و العضلة كلما نمت كلما حرقت الدهون و هذا هو المطلوب، و من الرياضة نحنا ما نبا بس نحرق الدهن نبغي نعدل العضلة و إنميها و البروتينات تساعد العضلة و تقويها و تنميها .. فأنا المدربة قالتلي بما إني آكل بروتينات و أكثر رياضة فأنا هني مب يالسه أحرق العضلة أنا بالبروتينات قاعده أغذيها و هي قاعدة تنمو و تحرق الدهون..

أنا هاللي أعرفه عن البروتينات مفيدة لعضلات الجسم و تقويها و تنميها..
فإرتحت يوم المدربة فهمتني هالشي و على فكرة كل ما نمت العضلة كل ما شديتي جسمج لأنه نمو العضلة تساعد على شد الجسم ..

و أنصحج من الحين نمي عضلتج و قويها من الحين ترا العضلة مهمة للجسم و حاولي معاها من الحين لأنها تاخذ وقت .. بالذات إذا كنتي تبين ترتبين جسمج و تبغينها تبرز شرات المدربات ..

بس لين الحين ماجربت آكل مكملات تحتوي على البروتين لأني ما أبا بروحي أشتري أبا أسأل عدل و بإستشارة مدرب أو دكتور .. !! بس مثل ماقلتلج أنا آخذ البروتين من الروب و الحليب و البقوليات ..

غير معرف يقول...

الله يعين بالنسبة للمعلومات تتغير حسب كل مدرب لانهم بالنهايه مدارس كل مدرسه عندها نظرياتها الخاصه فيها

انتي استمري على نشاطج ولا تتضايقين :>

AM.SA.CHANNEL يقول...

ترى أنا قلت نفس الشي، أكيد من مدرب إلى مدرب يفرق معاه بس أنا إرتحت أكثر لأنه هالمدربة دايما إدرب متان و ما شاء الله كلهم ظعفوا عندها ..

و بعد أنا في نفس الوقت بتم أسأل

غير معرف يقول...

اييه حبيبتي لآآيهمك أحد النآس تآخذ وتعطي وآنا اللي يقهروني اللي ينصحون وهم ماعندهم أي خبرة في المجآل اللي ينصحون فيه =/ .. صرآحة معلومة قمييلة ..تشكرآآت =)