الاثنين، 30 مايو 2011

بدأ العد التنازلي " للنباتيين فقط "


جاهزين .. 

ما بقى شي إلا يومين و نبدأ .. 

أنا ما بحسب أول 6 بنبدأ 2\6 عشان اللي يشتغلون و اللي تنزل رواتبهم اول الشهر على الأقل يسيرون يشرولهم أكل  .. 

و أنا أفضل لو كل كل وحده تبدأ تصور الأغراض اللي إشترتها، اللي حاب طبعا هالشي بيساعدنا على إنه إنوع الأشياء اللي ناكلها، و على فكرة ترا واايد أشياء لقيتها للنباتيين يوم كنت سايره سبينس حتى الجبن لقيت جبن للنباتيين .. !! 

و اللي متهايزة تصور، تقدر تحط صورة المنتج اللي خذته من النت و تحطه في البلوق مالها .. 

و حتى يومياتكم ممكن تنزلوونها و كل واحد بيشجع الثاني .. و مب لازم الوجبة كلها، ممكن تحطون لو وجبة وحدة ..
و اللي حاب طبعا يكتب تجربته يوم عن يوم .. و لو فكرتوا فيها إلا 7 أيام حتى لو خربتوا و خبصتوا كتبوا لأنه الكتابة ترا تساعد و إنتوا مب حاسين .. !! 

و ثاني شي لو كل وحده كتبت شعورها و قالت شو كلت و حطت صور هالشي بيشجع لأنه أنا بكتب، و مثلا شفت تامي راده عليه بدخل تدوينتها و بشوف شو منزله و بيلس أقرا شو كاتبه و بحس إنه مب بس أنا مثلا خربطت حتى غيري خربوا هههه من البداية مخربين عقب بدخل مثلا عند علايه و عقب مي أون دايت و هكذا  .. 

و أنا أنصحكم بعد اللي بتنزل موضوع في تدوينتها تحط اللينك مالها بعد لأنه وايدين يدخلون  و مب الكل يقرا الكومنتس بس يوم بيشوفون حط حاط لينك بيدخلون .. اللي حاب طبعا يحط اللينك و إذا متهايزين شراتي برايه هههه ..


أنا يمكن بكلف عليكم بهالشي، لكن أنا ليش أباكم تسوون هالشي، عشان تتحمسون و أنا أتحمس، حتى إنتوا بيتكم أفكار وبتكتشفون أشياء يديده..  

طبعا في هالشي مب ملزومين لكن اللي حاب .. 

و آخر شي حبيت أقلكم، ترا الأكل النباتي لازم تاكلون تكثرون في أشياء معينة، مثل الخضار و في خضار معينة فيها نسب بوتاسيوم عالية و فيه كالسيوم و حديد، كثروا منه .. 

و لازم تعرفون كل شي يدخل في حلجكم شو فيه من فيتامينات و معادن،  و أنا أنصحكم تسوون سيرج عن كل الخضار  و الفواكة اللي تحبونها ..
هالشي بيخليكم تعرفون شو تاكلون و تركزون على شو .. 
و ترا الجسم ما يسحب الكالسيوم النباتي بسرعة نفس الحليب العادي ف عشان جي كثروا من الكالسيوم  يعني مثلا اللي يشرب حليب الصويا أو العيش أو الألموند يحاول يشرب كوبين في اليوم أو حتى 3 .. لأنه فيه كالسيوم و بروتين، و حاولوا تركزون على الخضار اللي فيها كالسيوم و حديد بعد مثل البروكلي اللي لازم تخلوونه روتينكم اليومي .. 

و لازم تقرون كل شي قبل لا تشتروونه، و على فكرة الكاكاو لا تتسرعون و تشتروونه حتى لو كان الأسود شوفوا إذا فيه إضافات أو لا 

و إذا سرتوا السوبرماركت أو الجمعيات لا تستحون و سألوا.. إنه المنتج مايحتوي على أي عنصر حيواني .. 

و صح العضلة بعد بالذات اللي يسوون رياضة، و أنا أنصحكم لو تمشوون على الأقل يوميا فليل نص ساعة بس أعرف حر بس على الأقل شوفوا النفسية كيف تتغير بعد المشي .. 

المهم أنصحكم تاكلون الأشياء اللي ممكن تلقون فيها بروتينات مثل البقوليات وهالبقوليات تحتوي على نسب  عاليه من البروتينات و الكاربوهيدرات و الألياف و يحتوي على الحديد .. 

كلوا يوميا بما يعادل قبضة اليد من المكسرات، لأنه تحتوي على دهوون جيدة للجسم .. 

هذا اللي عندي اليوم .. و إن شاء الله تكونووون مستعدين .. 


و اللي عنده أي سؤال أنا جاهزة

هناك 7 تعليقات:

غير معرف يقول...

أنا علايه، ع فكره انا وايد متضايقه لني ماروم أدخل بيوزري :(

المهم ، كتبت نظامي النباتي خلال الـ 7 أيام ، بس النظام قابل للتعديل

الفطور:
واحد من هذه الخيارات
1-كورن فليكس نباتي Kellogg's Bran Flakes + حليب الصويا + ملعقة عسل
2-فندال (بطاطا حلوه) مشويه + كوب حليب الصويا أو مكسرات طازجه بحجم قبضة اليد
3-الشوفان + حليب الصويا + ملعقة عسل
4-جميع أنواع البقوليات (باجيله و لوبيا و دانغو)+ كوب حليب الصويا

وجبة خفيفه:
-فاكهتين و عصير جزر

الغداء :
سمك مشوي + بطاطا أو 6 ملاعق من العيش (الرز) + كميه كبيره من السلطة

وجبة خفيفه:
-فاكهتين و عصير جزر أو عصير الموز ( موز + حليب الصويا +ملعقه عسل)
-مكسرات بقبضة اليد

العشاء:
-كوب حليب الصويا + سلطه مشويه بالبخار+ الفطور:
واحد من هذه الخيارات
1- كورن فليكس نباتي Kellogg's Bran Flakes + حليب الصويا + ملعقة عسل
2- فندال (بطاطا حلوه) مشويه + كوب حليب الصويا أو مكسرات طازجه بحجم قبضة اليد
3- الشوفان + حليب الصويا + ملعقة عسل
4- جميع أنواع البقوليات (باجيله و لوبيا و دانغو)+ كوب حليب الصويا
وجبة خفيفه:
- فاكهتين و عصير جزر

الغداء :
سمك مشوي + بطاطا أو 6 ملاعق من العيش (الرز) + كميه كبيره من السلطة

وجبة خفيفه:
- فاكهتين و عصير جزر أو عصير الموز ( موز + حليب الصويا +ملعقه عسل)
-مكسرات بقبضة اليد

العشاء:
-كوب حليب الصويا + سلطه مشويه بالبخار + شوربة خضار أو كويكر
-بطاطا مقطعه و مشويه بالفرن و منثور عليها اوراق زعتر مجففه+ سلطة
-باذنجان مشوي + قرنبيط مشوي + شوربة خضار أو كويكر

أنا بإذن الله بسير باجر أشتري من السبينس الأغراض

غير معرف يقول...

سوري مادري ليش تكرر، اذا ترومين تعدلينه ، بليز احذفي المتكرر

AM.SA.CHANNEL يقول...

ماشاء الله عليج علايه رتبتي عمرج .. وايد حلو نظامج .. !!
و نفس ماقلت حاولي تركزين على البروكولي في كل شي لأنه تحتاجوون كالسيوم .. و معادن ..

بس ماشاء الله جدولج زين،
و أنا ما اعرف كيف أعدل، المشكلة عندي أمسح التعليق .. بطالع إذا بعرف ..

و يالله تشري و صوريلنا شو إشتريتي و صح علايه مساعه حاولت أدخل تدوينج بس يمكن إنتي مب سامحه لأي حد يدخل، لو تعدلين هالشي زين ز.

غير معرف يقول...

وااااو تحمست معكم انامعكم
اسبوع النباتيين رووووعه :)

غير معرف يقول...

yes girl
Im ready
بمووت من الحماس قبل لاسوي اي شي خخخ

غير معرف يقول...

ولامره جربت حليب الصويا وععععع احس بايخ الله يعزالنعمه وععع؟:(

AM.SA.CHANNEL يقول...

غير معروف 1

يفضل لو تحطيلج إسم عشان ما تستوي عندي لخبطة " غير معروف " الحين 3 أشخاص غير معرووف " هههه فإذا بتدخلين حطي إسمج ..

---------------------

غير معروف 2

ههههههه إن شاء الله هالحماس يتم بس لو تذكرين إسم أو نيك نيم عشان ما نتلخبط و أشكرج و إن شاء الله نقدر نكمل هالإسبوع ..

----------------

غير معروف 3

أنا يوم أسير أي كوفي الحين أطلبه بالعكس طعمه حلو .. و مب أي حليب صويا تشترين ترا يفرق من منتج لمنتج ..