الثلاثاء، 4 أكتوبر 2011

نظامي الغدائي :-


السلام عليكم ...

تصدقون إكتشفت إنه نحنا واايد عاداتنا الغذائية غلط معتقدين إنها صح لكن يمكن هالشي يمتنكم و إنتوا ما تدرووون .. !! أو أنا يمكن وصلت لمرحلة... وزني واقف صعب ينزل و أحتاج أغير عاداتي الغذائية ..

من هالأشياء اللي إكتشفتها:-

1. الفواكة ... لازم تحطون خطين حمر على الفواكة بمجرد دخول المغرب، أكبر غلط إنكم تاكلون فواكة فليل .. و ما أعرف ليش و شو السبب هل لأنها السكريات صعب تحترق في الليل و حتى أستغرب يقوولون تاكلين كاكاو ولا تاكلين فاكهة فليل .. !! و أنا قبل كنت آكل فاكهة معتقدة إنها ما بتسمني ... و دايما كلوا الفواكة قبل الأكل مب بعد الأكل ولا بتحسوون بنفخة في البطن ..

2. الخبز .. أنا الصراحة من محبي الخبز و أحس إنه هو شي أساسي في حياتي .. لكن أنا ممنوع لي كان أول إسبوعين تقريبا لكن الحين عادي بس مب كل يوم مرتين  أو مرة في الإسبوع بس لأني مرة كلت الخبز فليل ف عندي عقاب ما آكله إسبوع، و الخبز تحذروا تاكلوووونه فليل مهما كان أسمر أبيض شو ما كان الخبز ممنوع فليل حاله من حال الفواكة لكن ممكن الصبح أو الظهر تاكلوون الخبز الأسمر بس مب كل يوم ..

3. الحليب .. شربوا حليب لكن مب فليل،و أنا الذكية كنت راده البيت تعبانه و ما بغيت عشا ف شربت حليب مع عسل عشان يريحني و يهدي أعصابي و ماكنت اعرف إنه هالشي بيخرب عليه و ما ينزل وزني، المدربة كانت مستغربه ف دايما تسألني شو كلت ف سألتني شو تعشيت ف قلتلها حليب و عسل، و لو تشووفوون ويها شقى إستوى ههههه حسيت كأني ماكله فاست فوود، هي غيضت عليه قالتلي العسل فليل إنسي هذا أكبر غلط تسوييينه و مع حليب .. لأنه هالشي هو اللي مايخلي وزنج ينزل و إذا أبا أريح أشرب شاي الشمر .. و بعدين بقولكم شو فوايده العجيبة و بتلاحظوون بعد ..

4. الشوربات .. مسمووح، بس لازم تتأكدون إنها بدون زبدة، لكن حطوو خطين حمر وقت الليل، إنها ما تكون شوربة عدس أو شوربة حبوب أو نوع من أنواع البقوليات .. لأنها بتنفخكم .. و أنا جربت هالشي في رمضان كلت على الفطور ما آكل غير بقوليات مع سلطة و كنت أسوي رياضة قبل الفطور بالساعتين .. ولا كيلو تحرك وزني .. و عرفت إنه من البقوليات آخر شي .. شربوا  متى ما تبون لكن مب فليل

5. البقوليات إنسووها الفترة المسائية مثل الحمص النخي، البينز الباجلة..... إلخ بس فترة المساء إنسووها ..


رتبوا نظامكم في الأكل و إتبعوا النصايح اللي خبرتكم عنها و شووفووا كيف بيتغير جسمكم في إسبوع ..

و أنصحكم نصيحة الريوق اللي بتاكلونه اليوم غيروون اليوم الثاني ..

يعني مثلا اليوم أنا كلت كورن فلكس الأسمر مع حليب لو فات أو سكيمد .. باجر أنا باكل قوطي روب مع فواكة مثلا موز و برتقال اليوم اللي عقبه باكل خبز و هكذا ..

مثلا أنا بعطيكم .. شو آكل


أنا أكثر من المشاوي و الروب لأنها تحتوي على نسبة بروتينات عالية، و أنا لأني أسوي رياضة و هالشي يساعدني أكثر ..

أكثر من الأعشاب، لكن الحلويات ما آاااااي صوووبها أبدا إلا في حالة المكافأة إني نزلت 3 كيلوا ..

حاسبوا من الدونات و الأكلات السريعة، لأنه فيهااا دهووون عاليه، ممكن أنا بحرق اللي كلته لكن الدهون هي أصعب شي ما تحترق بسرعة مثل ما تحرقوون السعرات الحرارية ..


بعطيكم نظامي البارحة:-

* الريوق:-

كورن فليكس الأسمر مع حليب سكيمد مع موز مع عسير

السناك:-
عصير جزر .. ما كان عندي وقت آكل

* الغداء:-
2  سمج مشواي مع شوربة عدس مع سلطة  مع 5 حبات رطب ..

السناك:- تفاحة

العشاء:- صدر دجاج مشوي

------------------------

اليوم شو كلت

الريوق:-

روب سكيمد " و ماتوقعت روب سكيمد يكون جي عاده نفس اللو فات، بس عادي يستوي تكسرون لو فات أنا عشان ما أعود جسمي ف أكسر ما أباه يتعود على نظام أكل معين " المهم روب سكيمد مع حبة موز و حبة برتقال كنت أبا اسوي فروت سلد لكن ما كان عندي وقت، مع بياض بيض ..

السناك
ميني كيت كات
بلاك كوفي

الغداء:-

مشواي سمج أو شيش طاووق ..مع شوربة و إذا مافي شوربة  روب و سلطة و يمكن شوي حمص ..

السناك
ما أعرف شو لين الحين

العشاء:-

يا مشاوي يا سلطة مع روب ..


و باجر إن شاء الله بتريق خبز ..
عرفتوا شو أقصد لازم تسووون نظام تغيير كل يوم ..

انا الإسبوع الياي ببدأ أغير السكيمد إلى لوفات ما أبا أعود جسمي على شي معين .. و هاي أهم خطوة


أما عن شاي الشمر، أنصحكم تشربوونه لأنه صدق يساعد وواااايد في تذويب الشحوووب و ينزل الوزن و يدر البول و يريح الاعصاب و ريحته أحس تكفي ... جربووه ما بتندمون و حاولو تستبدلونه بدال الكوفي ...

و لا تنسون لازم تشربون واايد ماي، و تشربوووون أعشاب ..

و العشاء كل ما كان من وقت كل ما كان أحسن و نزل الوزن

هناك 3 تعليقات:

غير معرف يقول...

يعطييييج العافية وتنزلين وزنج بصحة يارب
متابعة المدونة من زمان ووايد استفدت من مواضيعج بنزول وزني العنيد. .وتحياتي الخالصة لج

AM.SA.CHANNEL يقول...

و الله هالوزن مشكلة يباله تكتيك و تخطيط .. !!

بالذات الحين وصلت لمرحلة يبالها شوي .. بس أنا اللي صدمني اليوم.. إني سرت عند دكتورة تغذية و حسيت إني طلعت صفــــــــــــــــــــــر .. كنت سايره ترتبلي .. و هي تبا تجرب ويايه

علايه يقول...

الصراحه صدمتيني

تدرين من رديت للدايت و انا وزني ما ينزل

و الحين اقرا موضوعج، و قلت يمكن عشان كان عشاي يوميا (سلطة فواكه+كوب حليب)

حاليا اشتركت مع شركة سليم اند لايت، و هم بيوصلولي كل الوجبات، لانه انا طول اليوم برع(دوام+كليه) فأرد البيت و أرقد ، فمحتاجه حد يهتم بأكلي